அலி, அரவானி, திருநங்கை

பிறப்பால் ஒரு பாலினத்தை சார்ந்தவர்கள், சில உயிரியல்(Biological) மாறுபாட்டினால் எதிர்பாலினமாக அகவுணர்ந்து, பல உளவியல் சிக்கல்களைக் கடந்து, தொடர்ந்து தங்கள் வாழ்க்கை முறையையும் அவ்வாறே நடத்துபர்கள் அலி/ பேடி என்ற சொல்லால் அறியப்பட்டு வந்தனர்.


கால மாற்றம் ஏற்படுத்திய சமூக மாற்றம், அலிகளை கேவலப்படுத்தி மகிழத்தக்க இழி பிறிவிகளாக கருதச் செய்தது. அதற்கேற்ப அலி/பேடி என்ற சொற் பயன்பாடும் ஒரு கேலிப் பொருளானது. இந்த சிறிய அறிமுகத்தோடு திருநங்கை என்ற பதத்திற்கான அவசியத்தை காண்போம்.


சமூகத்தில் அலிகளுக்கான விடுதலை எழத்துவங்கிய காலத்தில் அலி/பேடி என்ற சொல்லிற்கு இணையான, கண்ணியமான சொல் தேவைப்பட்டது. அதேகட்டத்தில், மகாபாரதத்தில் வரும் ஒரு கதாபாத்திரமான அரவான் கோயில் (கூத்தாண்டவர்) திருவிழா அலிகள் நிமித்தம் கடந்த 20
வருடங்களாக பிரபலமடைய துவங்கியது. அதனடிப்படையில், அலிகள் அரவானின் ஒரு நாள் மனைவியாக - கிருஷணாவதாரமாக (மோகினி) கருதப்பட்டு அரவானி என்றழைக்கலாம் என்ற கருத்து முன்னிருத்தப்பட்டதையொட்டி அரவானிகள் என்று அழைக்கப்பட்டு வருகின்றனர்.


இங்கு நாம் அரவான் கதையை விரிவாக, கூர்ந்து கவனிக்க வேண்டும்.

அரவான் என்பவன் யார்...? அர்ஜுனனின் மகன். தாழ்த்தப்பட்ட வகுப்பை சேர்ந்த ஒரு நாகர் குலப் பெண்ணுக்கும், அர்ஜுனனுக்கும் பிறந்த மூத்த வாரிசு. ஆனால், உயர்ந்த ஜாதிப் பெண்ணுக்கு பிறந்த மகனான அபிமன்யுவைப் போலன்றி, தந்தை(அர்ஜூனன்) னின் அரவணைப்பின்றி சமூக அங்கீகாரமும் மறுக்கப்பட்டு வளர்ந்தவன். இந்த ஒடுக்கப்படுதலுக்காக அர்ஜூனன் மீதான கோபத்தோடு வளர்ந்தவன்.

பின்னாளில் கௌரவ-பாண்டவர்களின், வெற்றி/தோல்வியை நிர்மாணிக்கக் கூடியனாக - களப்பலியாகக் கூடிய தகுதி உடையவனாகிய, அரவானே இருந்தான். அப்போதுதான், யுத்த தந்திரம் என்ற பெயரில் கிருஷ்ணன் என்னும் மாயாவி சூது வார்த்தையால் அரவானை களப்பலிக்கு சம்மத்திக்க வைத்தான். களப்பலியாவதற்கு முன்பாக தனக்கொரு மனைவியும், மனைவி மூலம் ஒரு வாரிசும் வேண்டிய அரவானை மணக்க யாரும் முன்வராத நிலையில், கிருஷ்ணனே பெண்ணாகவும் உருவெடுத்து அரவானை மணந்தான் அதாவது, வெற்றி ஒன்றே இலக்கு என்ற நிலையில் பெண் வேடமணிந்து சூது புரிந்தான்.

இன்று சமூக விடுதலை, சம அங்கீகாரம், சம உரிமை எனப் போரிடத் துவங்கியுள்ள அலிகள் ஒடுக்கப்படுவதலின் குறியீடாக, மேட்டுக்குடிகளின் சுயநலத்திற்காக பலிகடா ஆக்கப்பட்ட கதாப்பாத்திரம் மூலம் அறியப்படுவது (அரவானின் மனைவியாக) எத்தகைய நகைமுரணாகிறது!?.

------------------

மேலும், அதே மகாபாரதத்தில் அரவானின் தந்தையான அர்ஜூனனும் தான் பெற்ற சாபம் காரணமாக, அலியாக(பிரகன்நளை) சில காலம் வாழ்ந்த கதையுண்டு. இது, அரவான் - மோகினி கதையாடலுக்கு முன்பாகவே மகாபாரதத்தில் வரும் நிகழ்வு. மற்றொரு இதிகாசமான இராமாயணத்தில், ராமன் வனவாசம் செல்கையில் நாட்டு மக்கள் அனைவரும் அவர் பின் சென்றனர். அவர்கள் திரும்பிச் செல்லும் பொருட்டு ராமர் "ஆண், பெண் இருவரும் திரும்பி நாட்டுக்குச் செல்லுங்கள்" என்றார். ஆண், பெண் இருவரை மட்டும் தானே திரும்பிச் செல்லுமாறு சொன்னார் எனவே, நாம் செல்ல வேண்டியதில்லை என்று அலிகள் அனைவருமே ராமர் வனவாசம் முடிந்து நாடு திரும்பும் வரை அவருக்காக பதினாங்காண்டுகள் காத்திருந்த கதையும் உண்டு.

ஆக, அரவான் கதையாடலுக்கும் முன்பே அலிகள் வாழ்ந்த வரலாறு ஊர்ஜிதமாகும் பட்சத்தில் அரவானி என்ற சொல் வரலாற்றடிப்படையிலும் பொருத்தமற்றதாகிறது.

-------------

கிறுஸ்தவ மதத்தின் வேத நூலான பைபிளில் அன்னகர் என்ற சொல், தமிழ் மொழியில் பைபிள் அச்சான நாளிலிருந்தே கண்ணியமாக பயன்படுத்தபட்டு வருகிறது.

ஆண்/பெண் என்ற சொல் மதம்/இனம் அல்லாமல் பாலியலை மட்டுமே குறிக்க பயன்படுத்தப்படுகிறது. அலிகளோ சராசரி ஆண்/பெண் போலன்றி மதம், இனம், மொழி கடந்து ஒடுக்கப்பட்டோர் என்ற வகையில் ஒன்றிணைந்து ஒற்றுமையாக வாழ்ந்து வருபவர்கள். அவர்கள் குறிப்பட்டதொரு மதம் சார்ந்து அழைக்கப்படுதல் ஜனநாயக அடிப்படையிலும், மொழியியலடிப்படையிலும் பொருந்தாது.

---------------

இனி திருநங்கை என்ற சொல்லைப் பார்ப்போம்,

திரு + நங்கை = திருநங்கை, பெண்பாலைக் குறிக்கக் கூடிய பலசொற்களில் ஒன்றான இது ஆண்பாலினத்திற்கு மட்டும் மரியாதை நிமித்தம் சேர்க்கப்படும் "திரு" என்ற முன்னொட்டு(prefix)டன் வருகிறது.

சீவக சிந்தாமணியின் 2558 வரியில் பயன்படுத்தப்படும் இது அழகிய பழந்தமிழ் சொல்லாக உள்ளது. மேலும், அலி என்னும் சொல்லிற்கிணையான பொருள் பொதிந்து, குறிப்பாக மதம், இன அடையாளம் கடந்த பொதுப் பெயராக ஏற்புடையதாகிறது.


********* **************** *************